fbpx

တော်လှန် နိုက်တင်ဂေးလ်များ

By MPA ( သတင်းဆောင်းပါး )
 
အရေးပေါ်လူနာရှိသည် ဆိုသည့် အကြောင်းကြားမှုကိုရလျှင်ရချင်း မထက်ထက်အပါအ၀င် ကလေး PDF မှ ဆေးတပ်ဖွဲ့၀င်များ ၊၎င်းတို့ကိုသင်တန်းပေးသည့်ဆရာ၀န်နှင့်အတူ တောင်‌အောက်ဆင်း၍ အရေးပေါ် ထွက်ခဲ့ ကြသည်။
စခန်း‌ရောက်တော့ လူနာက‌သွေးထွက်လွန်ကာ သတိလစ်နေပြီ ။ လူနာကို CPR (နှလုံး-အဆုပ်ပြန်လည်အလုပ်လုပ်စေရန် အရေးပေါ် ပြုစုခြင်း)လုပ်ပေးသော်လည်း မကယ်လိုက်နိုင် ။ ထိုအချိန် မှာပင် နောက်ထပ်ဦးခေါင်း ကျည်ထိလူနာတစ်ယောက်ထပ်ရောက်လာပြန်သည်။
 
“အဲ့ဒီလူနာကိုလည်း နိုးလာဦးမလား ၊အသက်ရူသံလေးများရှိလာဦးမလားဆိုတဲ့စိတ်နဲ့ CPR လုပ်ကြတယ် ” ဟု မထက်ထက်က‌ပြောသည် ။
 
ဆရာ၀န်က လက်လျှော့လိုက်တော့ဟု‌ပြောသော်လည်း မထက်ထက်တို့မရပ်ဘဲ ဆက်ကြိုးစားကြသည် ။ သို့သော် အဆိုပါရဲဘော်ကိုလည်း မထက်ထက်တို့မကယ်လိုက်နိုင်ပြန်။
 
၂၀၂၁ ဒီဇင်ဘာလအတွင်း ခရစ်စမတ်နေ့မတိုင်မီ ဖြစ်ပွားခဲ့သောအဆိုပါဖြစ်စဉ်သည် သူ၏စိတ်အာရုံ တွင်စွဲ ထင်နေသည် ။ ပြည်သူ့ကာကွယ်ရေးတပ်ဖွဲ့ -ကလေး (PDF – Kalay) တွင် ဆေးတပ်ဖွဲ့၀င် အဖြစ်တာ၀န်ထမ်း ဆာင်ရန် သင်တန်းတက်‌နေစဉ်အတွင်း တိုက်ပွဲများပြင်းထန်လာပြီး အထက်ပါ ဖြစ်စဉ် ကြုံ‌တွေ့ခဲ့ခြင်း ဖြစ်သည်။
 
အသက် ၂၁ နှစ်သာရှိသေးသည့် မထက်ထက်သည် ကလေးမြို့ခံတစ်ဦးဖြစ်ပြီး PDF တပ်ဖွဲ့သို့၀င်လာသည်မှာ ငါးလကျော်ရှိပြီဖြစ်သည် ။ ရန်ကုန်တွင်‌ကျောင်းလာတက်နေချိန် အာဏာသိမ်းမှုနှင့်ကြုံတွေ့ကာ ဆန္ဒပြပွဲများ တွင်ပါ၀င်ခဲ့ရာမှ နေရပ်သို့ပြန် ၊နေရပ်ရောက်ကာမှ စစ်အာဏာရှင်ကိုအမြစ်ဖြတ်မည် ဆိုသည့်စိတ်ဖြင့် PDF တပ်ဖွဲ့သို့သူ၀င်ခဲ့သည်။
 
တောင်သူများဖြစ်သော မထက်ထက်၏မိဘများသည် သမီးဖြစ်သူ၏ ဆုံးဖြတ်ချက်အပေါ် မူလက သဘော မတူသော်လည်း လက်ရှိတွင်မူ သဘောတူလာကြသည်။
 
“အမေကအစကမကြိုက်ဘူး ။ အဖေကတော့ ဂုဏ်ယူတယ် ၊အားပေးတယ် ၊ခုတော့အမေလည်း ဘာမှ မ‌ပြော တော့ပါဘူး ” ဟု သူ၏ မိဘများအကြောင်းကိုပြောပြသည်။
 

လူငယ်တစ်ဦးဖြစ်သည့်သူသည် အများနည်းတူ လက်နက်ကိုင်တိုက်ခိုက်လို‌ သော်လည်း လက်နက် အင်အား မပြည့်စုံသည့် အခြေအနေတွင် ဒဏ်ရာရသူများကိုကုသပေးရသည့် ဆေးတပ်သားအလုပ်ကိုသာ ပြတ်ပြတ်သားသားရွေးချယ်ခဲ့သည်။
 
CDM ဆရာ၀န်များ ၊သူနာပြုများက မထက်ထက်တို့လို ဆေးတပ်ဖွဲ့၀င်များကို အခြေခံဆေးပညာ ရက်တို သင်တန်းပေးသည် ။ သင်တန်းပေးနေရင်းတိုက်ပွဲဖြစ်လာသည့်အခါ ပြေးသည့်အခါပြေးရ ရှောင်ရရှား ရဖြင့်ပင် ဆေးပညာကိုသင်ယူကြရသည်။
 
မထက်ထက်တို့ဆေးတပ်ဖွဲ့၀င်များသည် တိုက်ပွဲများနောက်သို့လိုက်ရပြီး ဒဏ်ရာရလူနာ များကိုပြုစု ကုသ သည့် အပြင် တပ်ဖွဲ့စခန်းချရာအနီးရှိကျေးရွာများမှ ပြည်သူများကိုလည်း ကျန်းမာ‌ရေး စောင့်ရှောက် မှုပေး သည်။
 
တိုက်ပွဲများပြင်းထန်လွန်း၍ ရှောင်ရတိမ်းရသည့်အခါ မိဘများနှင့်ပါအဆက်အသွယ်ပြတ်လေ့ရှိသည်။ ထိုအခါတွင် လူငယ်တစ်ဦးဖြစ်သော မထက်ထက်သည်လည်း မိဘများကိုလွမ်းစိတ်ဖြင့် မျက်ရည်ကျရ လေသည်။
 
“ကိုယ်က နိုင်ချင်လွန်းလို့လာတာလေ ။ အဆင်မပြေမှုတွေကအများကြီးပဲ” ဟု မထက်ထက်ကဆိုသည်။
 
PDF -Kalay တွင်မထက်ထက်တို့ကဲ့‌သို့အမျိုးသမီး‌ဆေးတပ်သား များစွာရှိပြီး ၎င်းတို့တွင် CDM သူနာပြု များ ၊ဆရာ၀န်များ နှင့်ဒေသခံများပါ၀င်ကြောင်း အဆိုပါတပ်ဖွဲ့‌ေပြာရေးဆိုခွင့်ရှိသူထံမှသိရသည်။
 
PDF – Kalay ကဲ့သို့ပင် အခြားနယ်‌မြေများမှ PDF တပ်ဖွဲ့များတွင်လည်း အမျိုးသမီး ဆေးတပ်သား များစွာ ရှိသည်။ လက်နက်မပြည့်စုံမှု‌ေကြာင့် တိုက်ပွဲများ၏ နောက်တန်းတွင် ငှက်ကြီးတောင်ဓားလွယ်၍ ရဲရဲဝံ့ဝံ့ လိုက်လေ့ရှိသောအမျိုးသမီးဆေးတပ်ဖွဲ့၀င်များတွင် မခရစ်စတီးနားလည်းပါ၀င်သည်။
တော်လှန် နိုက်တင်ဂေးလ်များကို သင်တန်းပေးနေစဉ် Photo – ထက်ထက်
 
ပြည်သူ့တော်လှန်ရေးတပ်မတော်( PRA ) မှဆေးတပ်ဖွဲ့၀င်တစ်ဦးဖြစ်သည့် မခရစ်စတီးနားသည် မြိုင်မြို့နယ် မှ ဒေသခံဖြစ်သည်။
 
မကွေးတိုင်းအတွင်းရှိ မြိုင်မြို့နယ်သည် အာဏာသိမ်းပြီးနောက်ပိုင်းကတည်းက စစ်ကောင်စီကို အကြမ်း မဖက် ဆန္ဒပြမှုများနေ့စဉ်လုပ်ဆောင်ခဲ့သလို လက်နက်ကိုင်တော်လှန်ရာတွင်လည်း ရှေ့တန်းမှပါ၀င်နေသည့် မြို့နယ်ဖြစ်သည်။
 
တော်လှန်ရေးအတွက်ဆိုလျှင် လက်၀တ်ရတနာများချွတ်လှူသည်အထိ စစ်အာဏာ ရှင်ဖြုတ်ချ‌ရေးစိတ်အားထက်သန်သော မြို့နယ်လည်းဖြစ်သည်။
 
ယင်းသို့ သမိုင်းလှသည့်မြို့နယ်မှ ဒေသခံတစ်ဦးဖြစ်သူ မခရစ်စတီးနားသည် အာဏာသိမ်းခံရပြီးနောက်တွင် PDFတပ်ဖွဲ့များကိုကူညီထောက်ပံ့ခဲ့ရာမှ နောက်ပိုင်းတွင်မူ စီးပွားရေးလုပ်ငန်းဖြစ်သည့် ရေနံလုပ်ငန်း ကိုထား ခဲ့ကာ PRA သို့၀င်ခဲ့ခြင်းဖြစ်သည်။
 
တပ်ဖွဲ့သို့၀င်ခဲ့ရာတွင် ပြင်ပတွင်နေထိုင်ခဲ့သည့်အခြေအနေနှင့် လုံး၀ကွာခြားသွားခဲ့ပြီး ပင်ပန်း ဆင်းရဲမှု များ ကြုံတွေ့ခဲ့ရသော်လည်းသူ စိတ်ဓာတ်မကျခဲ့။
 
“တခါမှမစားဖူးတဲ့ဟာတွေစားခဲ့ရတယ် ။ တခါမှမပြေးဖူးတဲ့နေရာတွေမှာပြေးခဲ့ရတယ် ။ မြေကြီး ပေါ်မှာ အိပ်ခဲ့ရတယ် ” ဟု မခရစ်စတီးနားက သူ၏ အတွေ့အကြုံ ကိုပြန်ပြောပြသည်။
 
တပ်ဖွဲ့သို့၀င်လာသူများ၏ အရည်အချင်းပေါ်လိုက်၍ အဖွဲ့များခွဲသည့်အခါ သူဆေးတပ်ဖွဲ့ သို့ရောက် လာခဲ့ သည်။ သူ၏ မိခင်မှာ ယခင်ကဆေးရုံအသင်း၀င်ဖြစ်ခဲ့သောကြောင့် မခရစ်စတီးနားအတွက် ဆေးပညာသည် အစိမ်း သက်သက်တော့ဖြစ်မနေ။
 
သင်တန်းတွင် လူနာသယ်ပိုးနည်း ၊ ပတ်တီးစီးနည်း ၊ သွေးတိတ်ဆေးထိုးနည်း ၊ အရေးပေါ် အသက်ကယ် ပြုစုနည်း စသည့် အခြေခံ‌ဆေးပညာများကိုသင်ယူရသည်။
 
လိုအပ်ချက်အရဆေးတပ်ဖွဲ့သို့ရောက်လာချိန်တွင်လည်း ကြိုးစားပမ်းစား လုပ်ကိုင်ခဲ့ပြီး တိုက်ပွဲများသို့ လိုက်ခဲ့ သည် ။ လက်နက်မပြည့်စုံမှုကြောင့် ဓားလွယ်ပြီးလိုက်ခဲ့ရသည်ဟုဆိုသည်။
 
“ဓားတောင်တစ်ယောက်တစ်ချောင်းမရှိကြပါဘူး ။ ” ဟု မခရစ်စတီးနား ကတိုက်ပွဲ လိုက်ရသည့် အခြေအနေကိုပြောသည်။
 
တိုက်ပွဲလိုက်ရင်း မိမိတပ်ဖွဲ့မှလက်နက်ကြီးထိ၍ကျဆုံးသွားရသည့်ဖြစ်စဉ်များ ၊ လက်နက်စမ်းသပ်ရင်း ကိုယ့်လူကိုယ်ကျည်ထိသည့်ဖြစ်စဉ်များသည် သူ့ကိုရင်နာစေသည်။
 
” အတူတူထွက်လာတဲ့ရဲဘော်ကိုလက်နက်ကြီးထိတယ် ။ သူမ‌သေမရှင်ဖြစ်နေချိန်မှာ စစ်သား‌တွေက သေနတ်နဲ့ပစ်သွားတာ ။ အလောင်းကိုနောက်နေ့မှသွား‌ကောက်ရတာ ” ဟု သူက မမေ့နိုင်သည့် တိုက်ပွဲ ဖြစ်ရပ်တစ်ခုကိုပြန်ပြောသည်။
 
သူ့အနေနှင့်အနေဆင်းရဲ အစားဆင်းရဲမှုများအပေါ် ထူးထူးထွေထွေမခံစားရသော်လည်း လက်နက်မပြည့်စုံမှု အပေါ်တွင်မူ စိတ်ခံစားချက်ရှိနေသည်။ နှစ်ဖက်အပြန်အလှန်ပစ်ရင်းသေရခြင်းမျိုးမဟုတ်ဘဲ မိမိဘက်က မပြည့်စုံ၍ မကာကွယ်နိုင်သည့်အခြေအ‌နေအ‌ပေါ် စိတ်မကောင်းဖြစ်ရသည်ဟု မခရစ်စတီးနားက‌ပြောသည်။
 
” ကျမတို့ကဆေးတပ်ဖွဲ့ဆိုပေမယ့် ဆေးကုရုံ သက်သက်ပဲ မဟုတ်ပါဘူး ။တိုက်ပွဲတိုက်ရမယ်ဆိုရင်လည်း တိုက်နိုင်တဲ့ အမျိုးသမီးတွေပါ ” ဟု သူကပြောသည်။
 
PRA ဆေးတပ်ဖွဲ့တွင် မခရစ်စတီးနားတို့လို အသက် ၃၀ကျော်အရွယ်အမျိုးသမီးများပါသလို အသက် ၂၀ကျော်အရွယ် လူငယ်အမျိုးသမီးများလည်းပါ၀င်သည် ။ ဒေသခံ CDM သူနာပြုများ ၊ ဘွဲ့ရပညာတတ်များ ၊ကျောင်းဆရာမများလည်းပါ၀င်ကြောင်း PRA ဆေးတပ်ဖွဲ့‌ခေါင်းဆောင်က ပြောသည် ။
 
” အမျိုးသမီးအားလုံးကတော်လှန်ရေးစိတ်ပြင်းထန်ကြတယ်။ တိုက်စရာရှိရင်တိုက်မယ်၊ လိုအပ်ရင် ဆေးကုမယ် ပေါ့” ဟု ၎င်းက အမျိုးသမီးတပ်ဖွဲ့၀င်များ၏ တော်လှန်ရေး အပေါ်ထားရှိသည့် စိတ်ဓာတ် ကိုပြောသည်။
လက်နက်မပြည့်စုံမှုများ ၊ဆေးဝါးမပြည့်စုံမှုများကြားမှပင် ဆေးတပ်ဖွဲ့၀င်အမျိုးသမီးများသည် ကျရာ တာ၀န်ကို ကျေပွန်စွာထမ်းဆောင်ရင်းတော်လှန်ရေးကိုထမ်းပိုးထားသည်။
တော်လှန် နိုက်တင်ဂေးလ်များကို သင်တန်းပေးနေစဉ် Photo – ထက်ထက်
 
အလှူရှင်များက လိုအပ်သည့်ဆေးဝါးများပံ့ပိုးပေးသော်လည်း တိုက်ပွဲများဖြစ်သည့်အခါ ဆေးဝါး ၊ ဆေးပစ္စည်း လိုအပ်ချက်ကအမြဲရှိနေသည်ဟု PDF -Kalay မှမထက်ထက်ကပြောသည်။
 
” တိုက်ပွဲဖြစ်လို့လူနာရောက်လာပြီဆိုရင် ဒီလူနာကို operation လုပ်နေရင်းနဲ့ ဆေးတွေကုန်သွား တာမျိုး ကြုံရတယ် ။တိုက်ပွဲဖြစ်နေရင်းကိုယ့်ဘက်ကကျည်ကုန်လို့နောက်ဆုတ်လိုက်ရတဲ့ အခြေအနေ တွေလည်း ရှိတယ် ” ဟု သူကပြောသည် ။
 
ထို့ပြင် ၂၀၂၁ နို၀င်ဘာလအတွင်းက ကလေးမြို့ အနောက်‌ေတာင်ဘက်ဒေသ ချင်းပြည်နယ်အစပ်တွင် ဒေသကာကွယ်ရေးတပ်ဖွဲ့များနှင့် စစ်ကောင်စီတပ်များကြားနှစ်ရက်ဆက်တိုက်ပွဲဖြစ်ပွားခဲ့ပြီး PDF -Kalay စခန်းတစ်ခုသိမ်းပိုက်ခံရကာဆေးတပ်ဖွဲ့၀င်အမျိုးသမီး ၁၀ဦးနှင့်အမျိုးသားနှစ်ဦးဖမ်းဆီးခံခဲ့ရသည်။
ယင်းတို့အနက် ဆေးသင်တန်းလာရောက်ပို့ချသူ အမျိုးသမီးတစ်ဦးနှင့်အမျိုးသား နှစ်ဦးမှာ သတ်ဖြတ် ခံခဲ့ရသည်။
 
ဆေးတပ်ဖွဲ့၀င်အမျိုးသမီးများအတွက် တိုက်ပွဲအတွင်းအသက်ဆုံးရှုံးနိုင်ချေရှိသလို ဖမ်းဆီးသတ်ဖြတ် ခံရသည့်ဖြစ်စဥ်များလည်း ရှိနေသည့်တိုင် တော်လှန်ရေး အောင်မြင်သည်အထိ ရှေ့ဆက်သွားမည်ဟု ၎င်းတို့ကဆိုသည် ။ ထို့ပြင်ပြည်သူများအနေဖြင့်လည်း တော်လှန်ရေးအတွက်တတ်နိုင်သည့်ဘက်မှ ဝိုင်း၀န်းပူးပေါင်းကူညီကြရန်လည်း ၎င်းတို့ကမေတ္တာရပ်ခံသည်။
 
“ကျမတို့လမ်းစဉ်က စစ်တပ်ကိုတိုက်ထုတ်ဖို့တစ်လမ်းတည်းပဲ။ ဘယ်လောက်ပဲအခက်အခဲတွေရှိနေပါစေ အဆုံးထိသွားကြမယ် ” ဟု မခရစ်စတီးနားက ပြောသည်။
 
#ကရင်နီ #သူနာပြု #တိုက်ပွဲ #သတင်းဆောင်းပါး #MPA #အမျိုးသမီး
 
ပုံစာ – တော်လှန် နိုက်တင်ဂေးလ်များကို သင်တန်းပေးနေစဉ်
 
Photo – ထက်ထက်

Leave a Reply

You might like

© 2022 Myanmar Pressphoto Agency - WordPress Theme by WPEnjoy
%d bloggers like this: